সৗগৗয় অৗন দঁড়

অৗয়ৗত রে ঞুনুম, উঞুম দঁড় ক রেয়াঃ সৗগৗয় কানওয়া দঁড় সাঁও অকালেকা তেয়ারঃ আ অনাগে সৗগৗয় অৗন দঁড় ব মেতাঃ কানা। দঁড় দ অনাগে ব মেতাঃ কানা - অৗড়ৗ ক জখেজ গৗ্নৗট, জেনেৎ, জতজ এমান ক আতে অনা অৗড়ৗ অৗয়ৗত রে বেওহারঃ লেকা মৗ্ন এ ঞাম এদ কানা উনদ অনা অৗড়ৗ দঁড় রে বনদলঃ কানা। জেলেকা - অৗড়ৗ জম - জমেৎ (জম+এৎ) দঁড় রে ফেরাও এনা। মিৎটান পৗঠয়ৗ জুদি বন কুলিয়েয়া, 'সিতৗদ ঠিলিতে ডৗ্ডিখন দাঃএ লো আগুয়েদা' - নওয়া অৗয়ৗত রে ঠিলি আর ডৗ্ডি দ চেৎ লেকান সৗগৗয়ৗন দঁড় কানা? তেলারে মেনকেদায় - ঠিলি দ দিপিলান আর ডৗ্ডিদ দাঃ তাহেনান। পৗঠয়ৗয়াঃ তেলারে বাডায় এনা বুধ অৗকিল মেনাঃ তায়া, মেনখান বুঝাওঃ কানা উনিদ সৗগৗয়ৗন দঁড় সাঁওতে আওরিয় উপরুমঃআ।

লাতার রেয়াঃ অৗয়ৗত ঞেল লেখান সৗগৗয়ৗন বাবত বন বুঝৗো তিয়োঃ দাড়েয়াঃআ।

সিতৗদ ডৗ্ডি খন ঠিলিতে দিপিল কাতে দাঃ অড়াঃ রেনাঃ হাঁডারেয়  দুল এদা। 

অকয়ে দুল এদা - সিতৗ

চেৎ এ দুল এদা - দাঃ

চেৎ লেকা কাতেঃএ দুল এদা - ঠিলিতে দিপিল কাতে

চেৎ রেয় দুল এদা - হাঁডারে

অকা খনে আগুয়েৎতে দুল এদায়  - ডৗ্ডি খন

অকারেয় দুল এদা - অড়াঃরে।

ঞেলঃ কানা 'দুল এদা' কৗনয়ৗ সাঁওতে (সিতৗদ, দাঃ, দিপিল কাতে, হাঁডারে, ডৗ্ডি খন, অড়াঃরে) সানাম দঁড় রেনাঃ মিৎটান বাং মিৎটান সৗগৗয় তপল মেনাঃ আকাদা। ঞুনুম আর উঞুম রেনাঃগে সৗগৗয়ৗন দঁড় দ হুয়ুঃআ। তবে গুনুন জখেজ গুন ঞুনুম লেকাতে বেওহার লেনখান অনারেহঁ সৗগৗয়ৗন দঁড় হুয়ুঃআ। জেলেকা - সেঁড়াঃরেনাঃ আয়মা উপৗয় মেনাঃআ। ঞেলগঃআ কৗনয়ৗ সাঁও সৗগৗয় তপলঃআ তুরুয় লেকাতে অনাতে সৗগৗয়ৗন হঁ তুরুয় হৗটিঞরে হৗটিঞ আকানা। খৗমিদিয়ৗ, খন্দিয়ৗ, সাপাবিয়ৗ, ছুডৗ্রিয়ৗ, ঠাঁওকিয়ৗ, হামেঠিয়ৗ।

নডে সিতৗদ - খৗমিদিয়ৗ, দাঃ - খন্দিয়ৗ, ঠিলিতে দিপিল কাতে - সাপাবিয়ৗ, হাঁডারে - হামেঠিয়ৗ, ডৗ্ডি খন - ছুডৗ্রিয়ৗ,  অড়াঃরে - ঠাঁওকিয়ৗ।

আরহঁ ঞেলঃ কানা নানাহুনৗ্র সৗগৗয়ৗন দঁড় রে আয়মা লেকান গৗ্নৗট আর কৗনয়ৗ জেনেৎ এম কাতে হুয় আকানা।

দড়	গৗ্নৗট	জেনেৎ	সৗগৗয়ৗন দড়
সিতৗ	দ	-	খৗমিদিয়ৗ
দাঃ	০	-	খন্দিয়ৗ
ঠিলি	তে	-	সাপাবিয়ৗ
দিপিল	কাতে	-	সাপাবিয়ৗ
হাঁডা	রে	-	হামেঠিয়ৗ
ডৗ্ডি	খন	-	ছুডৗ্রিয়ৗ
অড়াঃ	রে	-	ঠাঁওকিয়ৗ

কানওয়া	কানওয়া জেনেৎ
দুল	এৎআ(এদা)

খৗমিদিয়ৗ - অৗয়ৗত রেনাঃ জাহাঁ ঞুনুম সে বাংখান উঞুম কৗ্মি পুরৗওয়েৎ কানায় অনা দ হৗ্মিদিয়ৗ হুয়ুঃ কানা। বিসির ভাগ কৗনয়ৗ হিঁস রে 'অকয় বাংখান চেৎ' এম কাতে কুকলি লেখাজ তেলা জাহাঁ ঞামঃআ অনাগে খৗমিদিয়ৗ হুয়ুঃকানা। জেলেকা - অনিমা পাড়হাঃ কানায়। অকয় পাড়হাঃ কানায়? অনিমা।  হয় দ পছিম সেনখন রাকাব এনা। চেৎ রাকাব এনা? হয়।

খৗমিদিয়ৗ আরহঁ আয়মা লেকাতে হৗটিঞ দাড়েয়াঃআ -

অৗচু খৗমিদিয়ৗ - জাহাঁয় খৗমিদিয়ৗ আজ বাং কামি কাতে এটাঃ জাহাঁয়ে কামি অচ লেখান অনাদ অৗচু খৗমিদিয়ৗ হুয়ুঃ কানা। জেলেকা - মাহাসয়দ পৗঠয়ৗ্য়ে পাড়হাও অচয়েৎ কওয়া। আরহঁ অৗচু অচয়িজ দ কামিয় পুরৗও এৎতে উনিদ কৗ্মিয়ৗ খৗমিদিয়ায় হুয়ুঃআ।

গপড় খৗমিদিয়ৗ - মিৎটান অৗয়ৗত রে জুদি সাঁগে খৗমিদিয়ৗ ক তাহেনা আর মিৎ সাঁওতে কামিক পুরৗও লেখান অনা দ গপড় খৗমিদিয়ৗ হুয়ুঃআ। জেলেকা - গ বাবা হুড়ু ইরকিন চালাও আকানা।

খন্দিয়ৗ - খৗমিদিয়ৗ জাহাঁয় আতে কামি পুরৗও এৎ কানা অনাগে খন্দিয়ৗ সৗগৗয়ৗন হুয়ুঃআ। কৗনয়ৗ হিঁস রে 'চেৎ' আতে কুকলি দহ লেখান জাহাঁ তেলা ঞামঃআ অনাগে খন্দিয়ৗ সৗগৗয়ৗন কানা। জেলেকা - অনিমা পতব পাড়হাঃ কানায়। চেৎ পাড়হাঃ কানায়? পতব।

সাপাবিয়ৗ - খৗমিদিয়ৗ চেৎ তে সে অকয় আতে কামিতেৎ এ পুরৗও এৎ কানা অনা সাপাবিয়ৗ সৗগৗয়ৗন হুয়ুঃ কানা। ঢিংকিতে হলং ক হুড়ুংআ। বিন্ঠিতে আড়াঃক গেদা।

হামেঠিয়ৗ - জাহাঁ সে জাহাঁয় লাগিৎ বুঝৗও লেনখান উনি সে অনা দ হামেঠিয়ৗ সৗগৗয়ৗন হুয়ুঃ কানা। জেলেকা - আম লাগিৎ গিঞ আগু আকাদা। দিসম লাগিৎ ক লৗড়হৗয় কানা। 

ছুডৗ্রিয়ৗ - জাহাঁ খন কামিতেৎ পুরৗঃ কানা অনাগে ছুডৗ্রিয়ৗ সৗগৗয়ৗন। পিঁডৗ খনে ঞুর এনা। সেতাঃ খন দাঃ জরঃ কানা। কুঞ খন দাঃ আগুয়মে।

ঠাঁওকিয়ৗ - কামিরেনাঃ ঠাঁওগে ঠাঁওকিয়ৗ। কৗনয়ৗ সাঁও অকারে, তিস, চেৎরে এমান তেয়াঃ কুকলি রেনাঃ তেলা ঞামঃ কানগে ঠাঁওকিয়ৗ সৗগৗয়ৗন হুয়ুঃআ। কামারবাঁদি আতোরে জানাম লেনায়। ১৯৭০ সালরেঞ জানাম আকানা। পতবরে অল মেনাঃ আকাদা।

পৗঠয়ৗ অৗড়ৗ রেনাঃ সৗগৗয়ৗন

সৗগৗয়ৗন	মিৎ গটান	বার গটান	সাঁগে গটান
খৗমিদিয়ৗ	পৗঠয়ৗ/য়	পৗঠয়ৗকিন	পৗঠয়ৗক
খন্দিয়ৗ	পৗঠয়ৗয়ে	পৗঠয়ৗকিনে	পৗঠয়ৗকয়ে
সাপাবিয়ৗ	পৗঠয়ৗতে/হতেজতে/দারায়তে	পৗঠয়ৗকিনতে /হতেজতে/দারায়তে	পৗঠয়ৗকতে/হতেজতে/দারায়তে
হামেঠিয়ৗ	পৗঠয়ৗ লাগিৎ	পৗঠয়ৗকিন লাগিৎ	পৗঠয়ৗক লাগিৎ
ছুডৗ্রিয়ৗ	পৗঠয়ৗঠেনখন	পৗঠয়ৗকিন ঠেনখন	পৗঠয়ৗকঠেন খন
ঠাঁওকিয়ৗ	পৗঠয়ৗ ঠেন/রে	পৗঠয়ৗকিন ঠেন/রে	পৗঠয়ৗক ঠেন/রে